Lo luòc
Al Internauta, Al legeire, Al amic!
Sètz sul siti de CONVERGENCIA OCCITANA, associacion nascuda en 1998 de la volontat de mai de quaranta associacions occitanas…
Uèi CONVERGENCIA OCCITANA reünís mai de 90 associacions, de Tolosa, del departament o de la region, que trabalhan totas, directament o indirectament, per la lenga e la cultura occitana… e per la resplendor de nòstre “País Occitan”!
Aquesta associacion que ten ara mai de 25 ans d’existéncia gestiona e anima dempuèi 2006 l’OSTAL D’OCCITANIA, la Maison de l’Occitanie, dels locals, proprietat de la Comuna de Tolosa, que foguèron reviscolats de 2001 a 2006 : dins un escrinh del XV° sègle, l’anciana demòra dels Capitouls Huc de Boysson (1492) e Jean de Cheverry (1515) vos aculhís coma un refugi de patz e de cultura al còr de nòstra capitala occitana !
En aqueles luòcs venerables e remirablament reviscolats, venètz a l’encontra de las associacions que i an lor sièti social e que i trabalhan cada jorn (ensenhament, difusion culturala, edicion, formacion professionala, musica e teatre, ràdio, video e cinemà, filosofia e istòria, etc…) mas poiretz tanben profitar de las nombrosas activitats que i son presentadas, totjorn gratuitament : exposicions, conferéncias e concèrts dels “Dijòus de l’Ostal” o per manifestacions mès grandas (aniversari, fèsta de la musica, Diada de Catalonha, jornada del patrimòni, etc…)
La “Tuta d’Oc”, espaci de difusion de produchs culturals vos permetrà de vos procurar las darrièras publicacions en lenga d’Òc, mentre que “A Taula” vos aculhirà sus sa terrassa per una restauracion de terren ont los vins e los produchs locals occitans son totjorn a l’onor…
Convergéncia Occitana es mai que mai lo luòc dels escambis e de las sinergias entre los actors de la vida occitana, sap èsser presenta dins los grands moments de la vida de la ciutat en particular al moment de las manifestacions festivas, dins los bastiments e las placetas de la vila, per valorizar l’art occitan e los artistas contemporanèus.
Venètz, en un esperit de partatge, descobrir e presar la riquesa de nòstra cultura.
Jean-François Laffont
Président de Convergéncia Occitana.
