Convergéncia Occitana a per objectiu de “determinar e d’impulsar una vertadièra politica occitana per Tolosa e per l’Occitània”.
Aquesta associacion federativa foguèt fondada en 1998 a l’iniciativa de divèrsas associacions signatàrias d’una carta.

Aquesta associacion es un actor de la vida publica, es membre del rets europèu “NPLD” per la defensa dels dreits lingüistics en Euròpa. Dins cada eleccion dempuèi 2008, presenta als diferents candidats sos “Proposicions per lo desvolopament de la lenga e de la cultura occitanas”.

Los membres de Convergéncia Occitana partejan una meteissa concepcion de l’identitat occitana, pluriala, partejada, sociala e creativa. Aquesta concepcion s’apieja sus una civilizacion, una lenga e una literatura milenària.

La lenga e la cultura occitanas dobrisson un camp estendut d’experiéncias: musicalas, literàrias, educativas, socialas e civiques. Aqueles experiéncias e aquelas de l’ensemble de las lengas de França dites “regionalas” son la basa de la pluralitat culturala de nòstre país (abans l’apòrt de las immigracions).

Coma l’a mostrada Félix Castan, lo centralisme e l’unitarisme francés an dessècat lo país tot. Las grandas vilas foguèron provincializadas. La cultura occitana deu ajudar nòstras vilas a tornar èsser de “capitals” ont se produch naturalament de síntesis intellectualas, culturals e artisticas.

Convergéncia Occitana s’ataça tanben a desvolopar los ligams de Tolosa e de l’Occitània amb los Païses Catalans.